ລາວໂຮມລາວ ເພື່ອປະຊາທິປະໄຕ

ໃນຕອນເຊົ້າວັນທີ 5 ມັງກອນ 2018, ຄະນະຜູ້ແທນຄົນເຊື້ອຊາດລາວ ຈາກປະເທດການາດາ ທີ່ມາເຄື່ອນໄຫວຢ້ຽມຢາມ ແລະ ແຂ່ງຂັນບານເຕະມິດຕະພາບ ຢູ່ ສປປ ລາວ ຫລາຍກວ່າ 50 ຄົນ ໄດ້ເຂົ້າຢ້ຽມຂໍ່ານັບຄະນະນໍາສູນກາງແນວລາວສ້າງຊາດ, ໂດຍການໃຫ້ກຽດຕ້ອນຮັບຂອງ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ.ໂອກາດດັ່ງກ່າວ, ປະທານສູນກາງແນວລາວສ້າງຊາດ ໄດ້ສະແດງຄວາມຍິນດີຕ້ອນຮັບ ແລະ ແຈ້ງໃຫ້ຄະນະຜູ້ແທນດັ່ງກ່າວຊາບກ່ຽວກັບ ພາລະບົດບາດກຳມະການສູນກາງແນວລາວສ້າງຊາດຢູ່ຕ່າງປະເທດ ວ່າເປັນຕົວແທນຊາວລາວທີ່ດຳລົງຊີວິດຢູ່ຕ່າງປະເທດ ທີ່ມີພາລະບົດບາດສ້າງກຳລັງແຮງປວງຊົນ ແລະ ເປັນຄັນທຸງເຕົ້າໂຮມຄວາມສາມັກຄີປອງດອງຂອງຊາວລາວຢູ່ຕ່າງປະເທດ ເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມຄວາມອາດສາມາດ, ພ້ອມທັງເຜີຍແຜ່ວັດທະນະທຳ ແລະ ຮີດຄອງປະເພນີອັນດີງາມຂອງຊາດລາວ, ເປັນຜູ້ຮັບສ່ອງແສງມານະຈິດ, ຄວາມມຸ່ງມາດປາຖະໜາ ແລະ ຄວາມຄິດຄວາມເຫັນຂອງຊາວລາວຢູ່ຕ່າງປະເທດ ແລະ ເປັນໃຈກາງປະສານສົມທົບລະຫວ່າງຊຸມຊົນຊາວລາວຢູ່ຕ່າງປະເທດ ກັບ ສປປ ລາວ.

ທ່ານປະທານສູນກາງແນວລາວສ້າງຊາດ ຍັງໄດ້ຮຽກຮ້ອງໃຫ້ພີ່ນ້ອງລາວຢູ່ຕ່າງປະເທດ ຈົ່ງເພີ່ມທະວີຄວາມສາມັກຄີຮັກແພງກັນ ເພື່ອເປັນປຶກແຜ່ນ, ເປັນກ້ອນກຳລັງໜຶ່ງທີ່ສຳຄັນໃນວົງຄະນະຍາດແຫ່ງຊາດ ແລະ ສືບຕໍ່ສ້າງຄວາມສາມັກຄີ, ຮັກແພງກັບພີ່ນ້ອງຊາວລາວຢູ່ພາຍໃນປະເທດໂດຍຜ່ານກິດຈະກໍາຕ່າງໆ ເຊັ່ນ: ການມາທ່ອງທ່ຽວ, ການມາທອດກັນຖິນ ຫລື ທອດຜ້າປ່າ ໂດຍສົມທົບກັບພຸດທະສາສະນິກະຊົນຢູ່ ສປປ ລາວ ຫລື ຈະປະກອບສ່ວນເຂົ້າໃນການພັດທະນາການສຶກສາ, ສາທາລະນະສຸກ ແລະ ດ້ານອຶ່ນໆ ຕາມເງື່ອນໄຂຕົວຈິງ.

ໃນຕອນທ້າຍ, ທ່ານປະທານ ໄດ້ສະແດງຄວາມຍ້ອງຍໍຊົມເຊີຍຕໍ່ການເດີນທາງມາຢ້ຽມຢາມ ແລະ ແຂ່ງຂັນກິລາບານເຕະມິດຕະພາບ ຂອງພີ່ນ້ອງຊາວລາວຈາກ ປະເທດການາດາ ໃນຄັ້ງນີ້ ແລະ ຍາມໃດພວກທ່ານກໍ່ຍັງຄິດຮອດ ແລະ ກັບມາຢ້ຽມຢາມບ້ານເກີດເມືອງນອນ ເຖິງວ່າຈະດໍາລົງຊີວິດຢູ່ຕ່າງປະເທດກໍ່ຕາມ ພ້ອມທັງມີຈິດໃຈຮັກເຊື້ອ-ແພງຊາດ, ຮັກໃນຮີດຄອງປະເພນີ ແລະ ວັດທະນະທຳອັນດີງາມຂອງຊາດ ຊຶ່ງພວກທ່ານໄດ້ອະນຸລັກຮັກສາ ແລະ ເຜີຍແຜ່ໃຫ້ ຊາວຕ່າງປະເທດຮູ້ເຫັນ ເອກະລັກ ວັດທະນະທຳອັນດີງາມຂອງຊາດລາວ ພ້ອມທັງໄດ້ພະຍາມຍາມ ຖ່າຍທອດໄປສູ່ຄົນລຸ້ນໜຸ່ມຕໍ່ໄປ.

ໃນວັນດຽວກັນນີ້, ຄະນະຜູ້ແທນຄົນເຊື້ອຊາດລາວ ຈາກປະເທດການາດາ ທີ່ມາເຄື່ອນໄຫວຢ້ຽມຢາມ ແລະ ແຂ່ງຂັນບານເຕະມິດຕະພາບ ຢູ່ ສປປ ລາວ ຍັງໄດ້ເຂົ້າຢ້ຽມຂໍ່ານັບຄະນະນໍາກະຊວງສຶກສາທິການ ແລະ ກິລາ ໂດຍໃຫ້ກຽດຕ້ອນຮັບຂອງ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ.

ໃນໂອກາດນີ້, ທ່ານລັດຖະມົນຕີ ກໍ່ໄດ້ກ່າວສະແດງຄວາມຍິນດີຕ້ອນຮັບ ແລະ ແຈ້ງສະພາບລວມການພັດທະນາການສຶກສາໃນ ສປປ ລາວ ໂດຍສັງເຂບ ກ່ຽວກັບການພັດທະນາ ແລະ ການສົ່ງເສີມການສຶກສາຂອງ ສປປ ລາວ ໃນໄລຍະຜ່ານມາ, ຜົນງານການພັດທະນາການສຶກສາທີ່ພົ້ນເດັ່ນ, ບັນດາມະຫາວິທະຍາໄລຢູ່ແຕ່ລະແຂວງ, ການປະຕິຮູບການສຶກສາ ແລະ ຄວາມແຕກໂຕນການພັດທະນາການສຶກສາຢູ່ເຂດຕົວເມືອງ ແລະ ເຂດຊົນນະບົດ.

ທ່ານ ລັດຖະມົນຕີ ຍັງກ່າວວ່າ: ພີ່ນ້ອງຊາວລາວທີ່ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ສຳຄັນຊຶ່ງບໍ່ສາມາດຕັດແຍກອອກຈາກວົງຄະນະຍາດແຫ່ງຊາດລາວ, ພີ່ນ້ອງເຫລົ່ານີ້ເປັນແຫລ່ງກຳລັງແຮງອັນໜຶ່ງໃນການສ້າງສາພັດທະນາປະເທດຊາດ, ເປັນປັດໄຈສຳຄັນໃນການເປີດກວ້າງສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ກັບບັນດາປະເທດທີ່ເຂົາເຈົ້າອາໄສຢູ່ ແລະ ກັບບັນດາອົງການຈັດຕັ້ງສາກົນ ທີ່ຕິດພັນກັບເຂົາເຈົ້າ. ພັກ-ລັດມີຄວາມມຸ່ງຫວັງເປັນຢ່າງຍີ່ງທີ່ຢາກໃຫ້ພີ່ນ້ອງຊາວລາວທັງຢູ່ພາຍໃນ ແລະ ຕ່າງປະເທດ ມີຄວາມຮັກແພງສາມັກຄີກັນ ມີຄວາມທະນົງໃຈຕໍ່ການເປັນຄົນລາວ, ເຊື້ອຊາດລາວ, ມີຈິດໃຈຮັກຊາດຢ່າງສູງສົ່ງ ມີຄວາມດຸໝັ່ນຂະຫຍັນພຽນ ປະກອບສ່ວນເຂົ້າໃນພັດທະນາປະເທດຊາດ ໃຫ້ມີຄວາມຈະເລີນວັດທະນາ.ໃນຕອນທ້າຍ, ທ່ານ ລັດຖະມົນຕີ ໄດ້ສະແດງຄວາມຊົມເຊີຍຕໍ່ການເດີນທາງມາຢ້ຽມຢາມ ແລະ ແຂ່ງຂັນກິລາບານເຕະມິດຕະພາບ ຂອງຄະນະຜູ້ແທນເຊື້ອຊາດລາວຈາກ ປະເທດ ການາດາ ໃນຄັ້ງນີ້ ແລະ ກ່າວຍ້ອງຍໍ ສັນລະເສີນຕໍ່ນ້ຳໃຈຂອງຄົນເຊື້ອຊາດລາວຢູ່ ປະເທດ ການາດາ ທີ່ຍາມໃດກໍ່ໃຫ້ການອູ້ມຊູຍາດຕິພີ່ນ້ອງຢູ່ພາຍໃນປະເທດ, ປະກອບສ່ວນດ້ານວັດຖຸ ແລະ ສະຕິປັນຍາເຂົ້າໃນການຮ່ວມມືຊ່ວຍເຫຼືອທາງດ້ານການສຶກສາຢູ່ເຂດຊົນນະບົດ ແລະ ປະກອບສ່ວນທາງດ້ານອື່ນໆ ໃຫ້ແກ່ບ້ານເກີດເມືອງນອນທີ່ແສນຮັກຂອງຕົນ ພ້ອມທັງ ໄດ້ອວຍພອນໃຫ້ຄະນະຜູ້ແທນຄົົນເຊື້ອຊາດລາວ ຈາກການາດາ ເດີນທາງກັບຄືນປະເທດ ດ້ວຍຄວາມສະຫວັດດີພາບ.