ຜູ້ນຳພັກ-ລັດ ບໍ່ເຄີຍເຫັນການສະແດງກຳລັງປ້ອງກັນຊາດ ດ້ວຍຣະບົບ ໃໝ່
*(ຂປລ): ໃນໂອກາດຂ່ຳນັບຮັບຕ້ອນ ວັນສ້າງຕັ້ງກອງທັບ ປະຊາຊົນລາວ ຄົບຮອບ 63 ປີ ໃນຕອນເຊົ້າຂອງວັນທີ 19 ມັງກອນ 2012 ນີ້, ຢູ່ທີ່ວິທະຍາຄານ ທະຫານບົກ (ນ້ຳຊ່ວງ) ໄດ້ຈັດກິດຈະກຳການສະແດງ ສິລະປະຍຸດ, ຍຸດທະວິທີ ໂດຍຂະບວນເລົ່າຮົບຈາກກຳລັງປ້ອງກັນຊາດ ຊຶ່ງລາຍການສະແດງລວມມີ ຍິງເປີດປ້າຍຄຳຂັວນ ນ້ຳໃຈທີ 20 ມັງກອນ, ແກ້ໄຂການກໍ່ກະບົດລຸກຮື້ຂຶ້ນ ແລະ ຈັບຕົວປະກັນ, ການຈັ້ງທ່າສະກັດກັ້ນ ແລະ ບຸກໂຈມຕີສັດຕູ, ປືນປ້ອງ ກັນອາກາດດັບສູນເປົ້າໝາຍເທິງອາກາດ.
ເຂົ້າຮ່ວມຊົມການສະແດງຄັ້ງນີ້ ມີ ທ່ານ ບຸນຍັງ ວໍລະຈິດ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະ ທານປະເທດແຫ່ງ ສປປ ລາວ, ມີບັນດາທ່ານກົມການເມືອງສູນກາງພັກ, ກຳມະການສູນກາງພັກ, ລັດຖະມົນຕີ, ພະນັກງານຂັ້ນສູງ ແລະ ແຂກຖືກເຊີນເຂົ້າ ຮ່ວມຢ່າງຫລວງຫລາຍຫລາຍ.
ການສະແດງທັງໝົດສະແດງໃຫ້ເຫັນມູນເຊື້ອແຫ່ງການຕໍ່ສູ້ຂອງນັກຮົບປະຕິວັດໃນສະໄໝຕໍ່ສູ້ກູ້ຊາດ ທີ່ຄວາມເກັ່ງກ້າສາມາດ, ມີລະບຽບວິໄນ, ກຽມພ້ອມ ສູ້ຮົບຕະຫລອດເວລາ ແລະ ຄວາມອົງອາດກ້າແກ່ນ ຂອງທັບປະຊາຊົນລາວ ໃນພາລະກິດປົກປັກຮັກສາຜືນແຜ່ນດິນອັນອຸດົມ ສົມບູນນີ້ໄວ້ໃຫ້ໝັ້ນ ຄົງຕະຫລອດໄປ. ພາຍຫລັງສຳເລັດລາຍການສະແດງ ແລ້ວຄະນະຜູ້ແທນຍັງໄດ້ຊົມການວາງແດງອາວຸດ,ອຸປະກອນໃນ ການສູ້ຮົບ ຂອງເຫລົ່າຮົບຕ່າງໆ ເຊັ່ນ: ເຫລົ່າຮົບສ່ືສານ, ເຫລົ່າຮົບທະຫານຮາບ, ເຫລົ່າຮົບຍານເກາະ, ເຫລົ່າຮົບເຄມີ, ເຫລົ່າຮົບປ້ອງກັນອາກາດ ແລະ ອື່ນໆ. ອາວຸດທີ່ນຳມາວາງສະແດງມີທັງ ອາວຸດ ທີ່ນຳໃຊ້ໃນການ ຕໍ່ສູ້ກູ້ຊາດ ໃນເມື່ອກ່ອນ ແລະ ອາວຸດທີ່ມີຄວາມທັນສະໄໝ, ມີປະສິດທິພາບສູງໃນການນຳໃຊ້ ./.
