ລາວໂຮມລາວ ເພື່ອປະຊາທິປະໄຕ

ຢູ່​ເຂດຍອດ​ແຈ້ງ ​ເມືອງ​ໂພນ​ໂຮງ ​ແຂວງ​ວຽງຈັນ,ປະຊາຊົນ ໄລ່ນັກທຸລະກິດປູກ

ຢາງ ກັບປະເທດ

ໂຄງການ​ປູກ​ຢາງພາລາຢູ່​ເຂດຍອດ​ແຈ້ງ ​ເມືອງ​ໂພນ​ໂຮງ ​ແຂວງ​ວຽງຈັນ, ຂອງ​ບໍລິສັດ​ອັບ​ປໍ​ໂລ​ທາຍ​ສ໌ອາດຢຸດ​ສະ​ງັກ, ຫລັງ​ຈາກ​ທີ່ ມີປະຊາຊົນ ແລະ ເອກະຊົນຈຳນວນຫນຶ່ງ ໄດ້ເຂົ້າໄປຈັບຈອງແລະ ຊື້-ຂາຍທີ່​ດິນແບບບໍ່ຖືກຕ້ອງ​ໃນ​ບໍລິ​ເວນ​ດັ່ງກ່າວ, ຂະນະທີ່ບໍລິສັດຜູ້​ສຳ​ປະທານ ຂູ່ ອາດພາຍກະເປົາກັບບ້ານຫາກບໍ່ສາມາດບຸກເບີກເນື້ອທີ່ປູກຢາງໄດ້ 2.500 ເຮັກຕາ​ໃນ​ເບື້ອງ​ຕົ້ນ.

ຫລັງ​ຈາ​ທີ່​ມີ​ເລື່ອງ​ຂັດ​ແຍ່ງກ່ຽວກັບ​ການ​ສຳ​ປະທານ​ທີ່​ດິນ​ບໍລິ​ເວນ​ເຂດ​ບ້ານ​ຍອດ​ແຈ້ງ​, ຈົນ​ຜູ້ລົງທຶນ​ບໍ່ພໍ​ໃຈ​ຕໍ່​ຂໍ້​ຜິດພາດ​ໃນ​ການ​ປະກອບ​ທຸລະ​ກິດ, ຫລ້າ​ສຸດ​ເມື່ອທ້າຍເດືອນພຶດສະພາຜ່ານ​ມາ​ນີ້ ທ່ານ ນາງ ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ​ໄດ້​ນຳ​ເຈົ້າ​ຫນ້າ​ທີ່​ກ່ຽວຂ້ອງ ລົງສຳຫລວດພື້ນທີ່ການສຳປະທານເນືື້ອທີ່ດິນຂອງບໍລິສັດເຄພີໃນເມື່ອກ່ອນ ເຊິ່ງໄດ້ຮັບອະນຸຍາດການສຳປະທານດິນປູກໄມ້ອຸດສາຫະກຳ ຢູ່ເຂດຍອດແຈ້ງ ເມືອງໂພນໂຮງຈາກລັດຖະບານໃນປີ 1994 ຈຳນວນ 10.000 ເຮັກຕາ ,ແຕ່ປະຈຸບັນບໍສິສັດເຄພີໄດ້ມີການຮ່ວມມືກັບນັກລົງທຶນຊາວອິນເດຍ ​ແລະ ​ໄດ້​ປ່ຽນຊື່ມາ​ເປັນ ບໍລິສັດອັບປໍໂລທາຍສ໌ລາວ ໂດຍມີຈຸດປະສົງຈະບຸກ​ເບີກເນື້ອທີ່ດັ່ງກ່າວ ໃຫ້ກາຍເປັນສວນຢາງພາລາ ແລະ ຈະສ້າງໂຮງງານທີ່ສາມາດຜະລິດຢາງຕີນລົດຢູ່​ສປປ ລາວ​ໃນ​ອະນາຄົດ, ແຕ່ຜ່ານການລົງປະຕິບັດຢູ່ພື້ນທີ່ຕົວຈິງຊ້ຳພັດມີບັນຫາຕິດ​ຂັດ​ບໍ່​ຫນ້ອຍ, ຍ້ອນເນື້ອທີ່ດິນຈຳນວນ 10.000 ເຮັກຕາ ຢູ່ບໍລິເວນນັ້ນອາດບໍ່ຄົບຕາມຈຳນວນ, ຊ້ຳ​ບໍ່​ຫນຳຍັງມີປະຊາຊົນ ​ແລະ ຜູ້​ມີ​ອິດ​ທິພົນ​ເຂົ້າ​ມາຈັບຈອງ, ຊື້-ຂາຍ​ເນື້ອ​ທີ່​ດິນ​ດັ່ງກ່າວ​ແບບ​ຊະຊາຍ, ເຊິ່ງເປັນເຫດໃຫ້ການບຸກເບີກເນື້ອທີ່ສວນ​ເພື່ອກ້າ​ເບ້ຍ​ຢາງ ແລະ ການປູກຕ້ອງຊັກຊ້າອອກໄປ.

ທ່ານ ມູລາລີ ໂກປາວ ຫົວຫນ້າສາຂາບໍລິສັດອັບປໍໂລທາຍສ໌ລາວຈຳກັດ ອອກມາຂໍຮ້ອງຕໍ່ອຳນາດການປົກຄອງແຂວງວຽງຈັນ ໃຫ້ເຂົ້າໄປມີບົດບາດໃນການໄກ່ເກ່ຍຂໍ້ຂັດແຍ່ງບັນຫາທີ່ດິນໃນເນື້ອທີ່ສຳປະທານຂອງຕົນ ເພື່ອໃຫ້ກິດຈະການສາມາດດຳເນີນການຕໍ່ໄປໄດ້ເຊິ່ງບໍລິສັດຂອງຕົນເປັນບໍລິສັດຜະລິດຕີນລົດຍັກໃຫຍ່ໃນອິນເດຍ ແລະ ມີສາຂາໃນຫລາຍປະເທດໃນໂລກ ເຊິ່ງຄວາມຈິງໃຈຢາກລົງທຶນໃນ ສປປ ລາວ, ຖ້າຫາກເປັນໄປຕາມແຜນທີ່ວາງໄວ້ຄື: ສາມາດປູກຢາງພາລາຈຳນວນ 10.000 ເຮັກຕາໄດ້​ເມື່ອ​ໃດ ບໍລິສັດຕົນກໍຈະສ້າງໂຮງງານ​ຜະລິດ​ຢາງ​ລົດກັບທີ່ເລີຍເຊິ່ງຄາດວ່າຈະມີມູນຄ່າການກໍ່ສ້າງເຖິງ 50-60 ລ້ານໂດລາ.