ໂດຍການນຳພາຂອງ ສະມາຄົມ ສົ່ງເສີມຊຸມຊົນລາວ ແຫ່ງຣັຖ New South Wales ຊື່ຫຍໍ້ວ່າ (ສສຊລ) ຊາວລາວອົພຍົບ ໃນນະຄອນ Sydney ປະເທດ ອອສເຕຣເລັຽ ແລະ ຈາກຫົວເມືອງໃນເຂດອ້ອມແອ້ມ ໄດ້ຈັດພິທີເຄົາຣົບທຸງຊາດລາວ ‘ຊ້າງສາມຫົວ’ ຂຶ້ນໃນວັນອາທິດ ທີ 2 ທັນວາ ປີ 2018, ຢູ່ຕໍ່ໜ້າ ສູນວັທນະທັມ ແລະຫ້ອງການຂອງ (ສສຊລ).
ຊຸມຊົນຊາວລາວອົພຍົບ ເຊື່ອວ່າ ການເຄົາຣົບທຸງຊາດລາວ ‘ຊ້າງສາມຫົວ’ ເປັນອີກວິທີນຶ່ງ ທີ່ີພວກຂະເຈົ້າ ຈະສາມາດ ປູກຝັງຈິດສຳນຶກ ແລະ ເຮັດໃຫ້ຫລາຍຄົນ ທັງອາວຸໂສ ແລະເຍົາວັຍ ຊຶມຊາບເຖິງພູມກຳເນີດຂອງຕົນເອງ ຫລັງຈາກທີ່ໄດ້ອົພຍົບ ມາຕັ້ງຖິ່ນຖານໃນ ປະເທດນີ້ ໄດ້ຫຼາຍປີແລ້ວ. ດັ່ງ ປະທານ ສະມາຄົມ ສົ່ງເສີມຊຸມຊົນລາວ ທ່ານ ເດດ ສີແສງຣັດ ໄດ້ອະທິບາຍ ກ່ຽວກັບເຣື່ອງນີ້ວ່າ:
"ການມາເຕົ້າໂຮມກັນມື້ນີ້ ເພື່ອປະນາມ ວັນທີ 2 ທັນວາ ຊຶ່ງເປັນວັນກຳເນີດວັນອຸບາດ ໃນການທຳລາຍຊາດ ແລະ ປະຊາຊົນລາວ ເຄື່ອງໝາຍຊອງ ອິສຣະພາບ ພວກເຮົາກໍຄື ທຸງຊ້າງສາມຫົວ ທີ່ເຮົາຮູ້ວ່າ Freedom Flag. ການປະນາມມື້ວັນທີ 2 ທັນວາ ມື້ນີ້ ກໍເພື່ອໃຫ້ຊາວລາວອົພຍົບ ມີຄວາມຊົງຈຳວ່າ ວັນທີ 2 ທັນວາ ນັ້ນ ເປັນວັນພາໃຫ້ປະເທດຊາດ ພິນາດຈິບຫາຍ ແລະ ສໍາຄັນທີ່ສຸດ ເປັນການເຕືອນຈິດໃຈ ຊາວລາວອົພຍົບເຮົາ."
ສ່ວນຜູ້ອາວຸໂສຜູ້ນຶ່ງ ມະຫາ ບຸນແລວ ຄຸດດາວົງ ກໍໄດ້ໃຫ້ຄວາມເຫັນ ກ່ຽວກັບ ການຈັດພິທີ ເຄົາຣົບທຸງຊາດລາວ ໃນວັນທີ 2 ທັນວາ ນີ້ວ່າ:
"ທຸງຊາດລາວ ເປັນທຸງສຳຄັນມາແຕ່ດຶກດຳບັນ ແລະ ວັນທີ 2 ທັນວາ ເປັນວັນອຸບາດ ຂອງຄົນປະເທດລາວ ຢູ່ປະເທດລາວ. ພວກເຮົາ ມາຢູ່ນີ້ສລອງ ທຸງຊ້າງສາມຫົວ ເພື່ອໃຫ້ມີໄຊຊນະ. ພວກເຮົາອົພຍົບ ມາຈາກປະເທດລາວ ແມ່ນຍ້ອນ ວັນທີ 2 ທັນວາ ວັນມະຫາອຸບາດ ອັນນີ້. ເປັນຫຍັງຈຶ່ງພາກັນມາເຮັດໃສ່ ວັນມະຫາອຸບາດນີ້ ເພາະວ່າ ຢາກດ່າມັນ ປະນາມມັນ ປະທ້ວງມັນ ວັນຊົ່ວ ວັນມະຫາອຸບາດ."
ຄົນລາວທີ່ມາຮ່ວມ ພິທີ ເຄົາຣົບທຸງຊາດລາວ ‘ຊ້າງສາມຫົວ’ ໂດຍທົ່ວໄປ ເວົ້າວ່າ ບໍ່ເຄີຍລືມ ຊາດກຳເນີດ ຂອງຕົນເອງ, ເຖິງວ່າ ອອສເຕຣເລັຽ ໄດ້ໃຫ້ການຊ່ວຍເຫລືອອູ້ມຊູ ໃຫ້ບ່ອນຢູ່ອາສັຍ ໃຫ້ຊີວິດໃໝ່ ແກ່ພວກຕົນ ກໍຕາມ.
ຊາວລາວ ໃນຕ່າງປະເທດ ຈາກ 11 ອົງການ ໄດ້ພາກັນມາໂຮມຊຸມນຸມ ຢູ່ຕໍ່ໜ້າສະຖານທູດ ສປປລາວ ໃນວັນທີ 1 ທັນວາ 2018 ນີ້ ທີ່ນະຄອນຫຼວງ ວໍຊິງຕັນ ດີຊີ ສະຫະຣັຖອະເມຣິກາ. ນັກຂ່າວເອເຊັຽເສຣີ ຖາມວ່າ.
ພວກທ່ານມາໂຮມຊຸມນຸມກັນ ເທື່ອນີ້ ເນື່ອງໃນໂອກາດໃດ?:
“ພວກເຮົາມາຮ່ວມປະທ້ວງ ວັນທີ 2 ທັນວາ ເປັນວັນມະຫາວິວາດ ເປັນວັນສູນເສັຍຊາດ ຂອງລາວຂອງເຮົາ.”
ໃນການມາປະທ້ວງເທື່ອນີ້ ມີຄຳຮຽກຮ້ອງຫຼາຍຢ່າງ ຕົວຢ່າງຄຳຮຽກຮ້ອງ 3 ຢ່າງ ທີ່ສຳຄັນທີ່ສຸດ ທຳອິດນີ້ມີຫຍັງແດ່?:
“ນຶ່ງແມ່ນໃຫ້ປ່ອຍນັກໂທດ ທີ່ຖືກຈັບກຸມຄຸມຂັງ ລູກລາວແລະຫຼານລາວ ໃນປັດຈຸບັນນີ້ ກະມີ 3 ຄົນ ທີ່ເດີນທາງກັບປະເທດໄປຕໍ່ໜັງສືຫັ້ນ.”
ອີກຂໍ້ນຶ່ງທີ່ສຳຄັນ ຄືປະກົດວ່າຂໍຮຽກຮ້ອງໃຫ້ຣັຖບານລາວ ປ່ອຍຕົວນັກໂທດການເມືອງບໍ໊?
“ເຈົ້າແມ່ນແລ້ວ ນັກໂທດການເມືອງທີ່ຖືກກັັກຂັງ ທີ່ມີຊື່ແລະບໍ່ມີຊື່ ຢູ່ໃນລາວປັດຈຸບັນນີ້.”
ພວກມີຊື່ແມ່ນໃຜ?
“ພວກມີຊື່ແມ່ນ ທ່ານ ສົມບັດ ສົມພອນ ຮູ້ວ່າບັງຄັບໃຫ້ຫາຍສາບສູນ ຜູ້ທີ່ສອງມາກະແມ່ນ ທ່ານ ບຸນທັນ ທັມມະວົງ ເປັນເຊື້ອຊາດລາວ ສັນຊາດໂປໂລ້ຍ ແລະກະບຸກຄົນອື່ນໆອີກ.”
ນັ້ນແມ່ນຄຳຕອບຂອງ ທ່ານ ວັນລັງ ຄຳສຸກ ພັນທະມິດ ເພື່ອ ປະຊາທິປະຕັຍ.
ສຳລັບເຈົ້າເດຢາກຮຽກຮ້ອງຫຍັງ?
“ຢາກຮຽກຮ້ອງໃຫ້ລົບລ້າງສັນຍາພິເສດ ຣະຫວ່າງລາວ-ວຽດນາມ ເພິ່ນເຊັນກັນ ເພາະວ່າສັນຍານີ້ ເປັນສັນຍາວຽດນາມໄດ້ປຽບ.”
ທີ່ດິນເດ້ ເຣື້ອງບັນຫາທີ່ດິນເດ້ ພວກປະທ້ວງພວກທ່ານ ມີຄຳຮຽກຮ້ອງແນວໃດ?
“ຮຽກຮ້ອງບໍ່ຢາກໃຫ້ຣັຖບານລາວ ມີການສັມປະທານທີ່ດິນ ໃຫ້ແກ່ນາຍທຶນຕ່າງດ້າວ ດິນຂອງພວກເຮົາ ແມ່ນຊາວຕ່າງດ້າວ ແມ່ນນາຍທຶນ ຕ່າງດ້າວ ຄອບຄຸມເບິດ ສ່ວນປະຊາຊົນນິ່ ມີແຕ່ເສັຍຜົນປະໂຫຍດ.”
ເວົ້າໂດຍລວມໆລະພວກທ່ານມາປະທ້ວງເທື່ອນີ້ເພື່ອຮຽກຮ້ອງຫຍັງ?
“ກະຫຼັກໃຫຍ່ ກະແມ່ນຢາກແນ່ໃສ່ ຢາກໃຫ້ ສປປລາວ ຄນະນຳຂອງພວກເພິ່ນ ໃຫ້ປ່ຽນຣະບົບການປົກຄອງ ຊຶ່ງເປັນຣະບອບພັກດຽວນັ້ນ ຜະເດັດການ ຄອມມຸຍນິດ ຫັ້ນ ມາເປັນຣະບອບປະຊາທິປະຕັຍ.”
ຊາວລາວທີ່ມາປະທ້ວງພັກ-ຣັຖ ສປປລາວ ຄັ້ງນີ້ມີທັງໝົດປະມານ 16 ຄົນ ສ່ວນຫຼາຍກະມາຈາກ ສະຫະຣັຖ ອະເມຣິກາ ນີ້ເອງ. ອົງການ ທີ່ສຳຄັນ ທີ່ມາຮ່ວມເທື່ອນີ້ ກໍມີ ສະພາໂຮມລາວ ເພື່ອສັນຕິພາບ ເສຣີພາບ ແລະ ຟື້ນຟູຊາດ ລາວເສຣີ ອົງການທ້ອນໂຮມລາວ ເພື່ອ ປະຊາທິປະຕັຍ ແລະພັນທະມິດເພື່ອປະຊາທິປະຕັຍໃນລາວ.
ວັນໂຈນ 500 ເຂົ້ານັ່ງເມືອງ.
